Тогтвортой хөгжил гэж юу вэ?

Тогтвортой хөгжил гэж юу вэ?

• - Тогтвортойгоор хөгжинө гэдэг нь одоогийн хэрэгцээг хангахдаа ирээдүй үр хойчийн хэрэгцээгээ хангах чадварыг нь үгүй хийлгүйгээр хөгжихийг хэлнэ.
• - Тогтвортой хөгжил гэдэг нь улс орон, нийгмийн хувьд эдийн засгийн хэрэгцээг хангахдаа хүрээлэн буй орчиндоо хор хохирол учруулахгүй байх тэнцвэрийг хэлнэ.
• Тогтвортой хөгжлийн бодлогын хувьд анхааран авч үзэх ёстой гол элементүүд юу вэ?
• - НҮБ-с танилцуулсан Байгаль Орчин, Нийгэм, Засаглалын (БОНЗ) гурван элементэд хуваасан дараах үзүүлэлтүүд бүгд хангагдсанаар улс орны тогтвортой хөгжил бүрдэнэ гэж үздэг.

Үүнд:

1. Нийгмийн сайн сайхан байдлын үзүүлэлтүүд:

• - Нийгмийн бүлгүүдийн бүтэц, харилцаа, тэнцвэр
• - Хэвлэл мэдээллийн эрх чөлөө, мэдээлэлд нэвтрэх боломж, мэдээллийн аюулгүй байдал
• - Эрүүл мэндийн үйлчилгээ, нийгмийн эрүүл мэнд, хувь хүний эрүүл мэнд, шим тэжээлтэй хүнсний хүртээмж, хүнсний аюулгүй байдал
• - Санхүүжилтийн эх үүсвэр, амьдрахад хүрэлцээтэй цалин хөлс, амьдралын өртгийн судалгаа, хүртээмжтэй зээлийн боломж, нийгмийн хариуцлагатай хөрөнгө оруулалт
• - Хөдөлмөрийн харилцаа, хөдөлмөрийн аюулгүй байдал, эрүүл мэнд, хөдөлмөрийн нөхцөл, ажилтнуудад олгох сургалт, ижил тэгш харилцаа ба ялгаатай талуудын оролцоо
• - Бүтээгдэхүүний чанар, аюулгүй байдал, химийн бодисын аюулгүй хадгалалт ба хэрэглээ, ахуйн хэрэглээний бүтээгдэхүүний үйлдвэрлэл ба иргэдийн худалдан авах чадвар, хүрэлцээ

2. Байгаль орчны аюулгүй байдлын үзүүлэлтүүд

• - Агаар, ус, ургамал, хөрсний бохирдол, нөөцийн хомсдолд тавих хяналт
• - Цаг уурын өөрчлөлтийн эмзэг байдал, нөлөө, хүлэмжийн хийн ялгаруулалт, үйлдвэржилт ба эко үйлдвэрлэл
• - Ан амьтны амьдрах орчин ба нүүдэллэх зам, мал аж ахуй, хөдөө аж ахуй эрхлэгчдийн орчин, нүүдлийн ба фермийн аж ахуйд байгаль орчны нөөцийн хүртээмж, нөөц
• - Уул уурхай, байгалийн баялгийн нөөц, хортой ялгаруулалт ба нөөцийн хэрэглээний хяналт
• - Цэвэр технологи, ногоон технологи, ногоон барилга, сэргээгдэх эрчим хүч, инновацилаг технологийн төсөл
• - Хог хаягдлын менежмент, дахин боловсруулах үйлдвэрүүд, материалын дахин эргэлдүүлэлт буюу тойрог эдийн засаг
• - Бүтээгдэхүүний орц найрлага, байгальд био задралд орох чадвар, сав баглаа боодлын материал, байгаль орчинд ээлтэй байдал

3. Засаглал, менежментийн үзүүлэлтүүд

• - Дээд удирдах байгууллагын бүтэц, төлөөллийн чанар, үйл ажиллагааны нөлөөнд орж буй талуудын хэрэгцээ хүлээлтийг харгалзан үздэг байдал, ёс зүйтэй бизнес, ёс зүйтэй менежмент
• - Гүйцэтгэх удирдлага ба ажилтнуудын цалин хөлс, түүний гүйцэтгэлийн үнэлгээ хийх аргачлал, хэмжих үзүүлэлт, түүнд тогтвортой хөгжлийн хэмжих үзүүлэлтүүд орсон байдал
• - Өмчлөл, эзэмшил, тэдгээрийн тогтвортой хөгжил ба нийгмийн хариуцлагын үүрэг амлалт
• - Олон нийтийн харилцаа, ил тод тайлагнал, хэвлэл мэдээлэл болон иргэдэд нээлттэй шилэн данс, нягтлан бодох бүртгэлийн тайлан мэдээ, түүнд тогтвортой байдлын тайлан, татварын тайлагнал ба төлөлт
• - Кибер аюулгүй байдал, бизнесийн болон хэрэглэгчдийн мэдээллийг ашиг сонирхлын зөрчилтэйгөөр ашиглаагүй эсэх, авлига хээл хахуулийн эсрэг менежмент
• - Нийгэмд болон байгаль орчинд ээлтэй хөрөнгө оруулалт хийх, оффсет төлбөр төлөх үүрэг амлалт

Та байгаль орчин, нийгэм, засаглалд хамааралтай ямар ч ажил хийдэг байсан, таны ажил мэргэжлийнхээ талбарт хийж буй эерэг өөрчлөлт бидний тогтвортой ирээдүйн төлөө байх болно.